Churz zämegfasst: Tschou zäme, i bi dr Pesche, gebore bi-n-i am 20. Februar 1944 ds Bärn. Ds Wabere ha-n-i miner 9 Schueujahr absolviert u när e Laborantelehr bi dr Galactina ds Bäup gmacht. Anschliessend bini ds Burgdlef a ds Tech für Chemie ds studiere. Am Tech bi-n-ig i d'Studänteverbindig Kyburgia Burgdorf iiträtte u ha 1970 ds Studium abgschlosse. Während em Tech hani verschiedentlech jobt, under anderem ds Grinduwaud wo mi dr Bärg- u Klätter-Virus packt u mir mängi Chlätter- u Bärgtuur beschert het. Nach em Tech hani für ne Ami-Bude es guets Jahr ds Ängland u ds Gänf büglet bevor i wieder nach Bärn bi cho, woni nach ungerschiedleche Tätigkeite im 1990 d Bude vo-m-ne Kyburger-Couleurbrueder ha chönne übernäh. Die Chemie AG hani 25 Jahr gfüehrt u bi Ändi 2015 definitiv i Pension ggange. Ab denn hani ändlech gnue Zyt gha, mi mim aute Hobby, em Töff-Fahre z'widme wo i de letsche 40 Jahr druf beschränkt isch gsi dr Arbeitswäg u ab u zue es paar Ferietage u Churzreise under d'Redli ds näh Ziemli gli hani när e Link zum Pässewettbewärb ufgschnappt. D'Idee uf däm Wäg üsi schöni Schwyz im Detail u bis i hinderscht Winku lehre z'kenne u z'"erfahre" het mi voll begeischteret. E Härzinfarkt Ändi 2018 het mi chli brämset u mir e Wink mit em Zunpfahl gä. Guet rehabilitiert u es paar Zacke langsamer aber destwäge nid weniger intressant u abwächsligsrych nime-n-is wie's chunnt. . |